Gidoigilea eta sortzailea
Batzuetan irudi batek ideia bat sortarazten dit; batzuetan esaldi batek irudi bat; besterik ez edo hori guztia!
-Aita… zer zabiltza atzera eta aurrera? Jolasten?
-Bai, nire telefonoarekin ezkutaketan jolasten… ikusi al duzu?
-Ezin dizut esan, esaten badizut tranpa da, eta jolasetan ez da tranparik egin behar… baina (ahopeka) zergatik ez duzu deitzen?
-Eta hori ez al da tranpa?
-Hori telefonoa baino azkarragoa izatea da!
Deitu egin dut.
“…itzalita edo estaldurarik gabe dago…”
-Ba ez aita, bera da zu baino azkarragoa, galdu egin duzu! Jolasa eta telefonoa!
“-Aita, etorkizuna ikusteko tramankuluren bat asmatu nahi dut!
-Zertarako?
-Aita, zertarako izango da ba? Etorkizunean non izango naizen ikusteko, norekin, nola… gauza guztiak!
-Ba imajinatu! Bota irudimena! Itxi begiak eta imajinatu!
-Zuk ere bai? Nire lagun batek ere hori esaten du, imajinatzeko, baina nik ezin dut, ez dakit etorkizuna imajinatzen… begiak itxita esaten duzu? Begiak itxita dena ilun dago…”
“-…
-Memoria txarra nuela oroitzen dut!
-Ba hori oroitzea memoria ona da!
-Ez nuen ba memoria ona nuenik oroitzen!
-Lasai, ahaztu…
-Ahaztu zer?
-…”
“Korosti mendiko pagadi batean, luxuzko onttobeltz batean nuen apartamentua! Ni bezala asko gara azken astetan etxea galdu dugun iratxoak! Nik sikiera beste traste honetan aurkitu dut babesa…”
“Gaztelu izugarri handi batean bizitzearen alukeria, atetzarra itxi eta gora begiratzerakoan, dorre nagusiko azken ganberako argia piztuta ahaztuta utzi dugula ikustea da!”
“Burua husteko, beste zerbaitekin bete behar da. Niri kresal usainaz eta olatu hotsez betetzea gustatzen zait. Marea jaistean… horra, hutsik da!”
“- Inork ba al daki nora goazen?
– Aurrean doanak omen daki!
– A! Eskerrak!
….
– Eta aurrean nor doa?
– Psss… “
“Seme-alabak ingeniari, psikologo edo igeltsero izango diren pentsatzen dugun bitartean, beraiek zalantza egiten dute kinder arrautza, triskis paketea eta koloretako sugusen artean!”
“Badira egunak zertan ari naizen ez dakidala! Egun horietan gozatu egiten dut jostun izaten, funanbulista, astronauta, gizaki ikusezina, ahate-pilotua…”
“Aita, aita… ba al dakizu zer den abiadura bezain azkarra? Iluntasuna!”