Continue Reading" />

Bi ur tanten moduan

Etiketarik gabe Permalink 0

-Hara, ez zintudan zipriztindu nahi!

-Ez arduratu! Ez da erraza hemen ez zipriztintzea… hainbeste gaude!

-Ilun ere badago, ezta?

-Bai… denak bultzaka leku onena hartu nahian. Non ote gaude?

-Ez dakit… ontzi bat dirudi honek… tunel moduko bat… hortik aurrera jarriatuta aire librea!

-Benetan? Badut gogoa.

-Ni handik netorren zurekin topo egin dudanean.

-Aizu, galdetzea atrebentzia ez bada… zure ahotsa… ezaguna egiten zait… lehenago ere elkar ikusi al dugu nonbait?

-Nik ere horixe bera pentsatu dut. Zu izan al zara inoiz Legazpiko putzuren batean?

-Nik dakidala ez. Baina bainuetxe batzuetan bai egon nintzen. Zestoa Legazpitik gertu al dago?

-Ez dut uste, baina ni ez naiz sekula bainuetxe batean egon…

-Aizu… jakina, badakit, zu zara!

-Ni ni naiz, bai, baina… hara! Egia! Orain bai! Zu zara?

-Bai! Victoria ur-jauzietako ortzadarrean oroitzen zaitut… distiratsu…

-Harrituta nago, zurtuta, haluzinatuta!

-Zenbat aukera daude bi ur tantek berriro elkar ikusteko? Aukerak infinitesimalak behar dute!

-Hori zer da, asko edo gutxi?

-Gutxi, oso gutxi, ezinezkoa esango nuke nik!

-Zer egin duzu denbora guzti honetan?

-Batetik bestera ibili… Ozeano guztietan ibilia naiz, ez da itsasorik izango ni egon ez naizena… eta zu?

-Tira ez da erraza, nahiko deserosoa izan da…

-Ez nizun galdetu behar.

-Ez da ezer, glaziar baten izan ninduten preso.

-Benetan?

-Alaskan!

-Uau! Eta? Zer moduz?

-Hotza. Hotz handia, izugarria. Oroitzen dudan bakoitzean…

-Tira, ahaztu, orain libre zaude.

-Bai, eta eskerrak.

-Hemen gaude.

-Bai, hemen gaude… askotan oroitu zaitut… ortzadarrean, hainbeste kolore artean…

-Esango nuke elkarren ondoan egoteko sortutako bi ur tanta garela… hain zara gardena, freskoa…

-Zu ere ez zaude gaizki…

-Zoragarria izango da hemendik aurrerakoa…

-Zoragarria da dagoeneko.

-Eta hori? Entzun! Zer arraio da zarata hori?

-Txorrotada baten modukoa da… eutsi, mugitzen ari garela uste dut…

– Begira… argia ikusten da odiaren amaieran!

-Heldu!! Ontzi baten barrura erori gara! Ondo zaude? Heldu ezkutik berriro banandu ez gaitezen!

-Ur tantek ez daukagu eskurik!

-Zuk arrazoi… Bagoaz berriro… ilun dago hori… bagoaaaaaaaaz…

Zurrut.

Iruskinik gabe

Iruzkina uztea

Zure e-posta helbidea ez da argitaratuko. Beharrezko eremuak * markatuta daude


*

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.