“Kantu ederrak bizi diren tokia non dagoen jakingo banu, gehiagotan jongo nintzateke bertara”
“Ez inori ezer esan! Ez ezer esan nire etxekoei, ez ezer esan ez lagunei ez eta ingurukoei ere, lankide eta sare sozialetako lagun eta jarraitzaileei… ez inori esan arren! Munduaren amaierak honen antzeko zerbait izan behar du, fijo! EZ DAKIT BAZKALTZEKO ZER JARRIIII!!!!”
“Bizitzan helburu bakarra soilik gauza dibertigarriak egitea izan beharko luke! Ala, aspiragailua pasatzera noa, iuju!”
“-Alaba aldatu beharko zenuke…
-Alaba aldatu? Ez nuke alaba aldatuko ezta… munduko urre guztiaren truke!
-Ba zuk ikusiko duzu, baina pardela gainezka dauka!!”
“-Zuk uste handitzen naizenean nire gurasoek dituzten gauza guztiak izango ditudala?
-Jakina… beraien gauza guztiak zuretzat! Bueno, eta niretzat, biontzat, bale?
-Ba nik ez ditut nahi!
-Zer?
-Ez ditut beraien haserreak nahi, ez dut estresa nahi, ez dut itomena nahi, ez dut egonezina nahi…
-A, ia… Orain zertan jolastuko gara?”
-Aita… zer zabiltza atzera eta aurrera? Jolasten?
-Bai, nire telefonoarekin ezkutaketan jolasten… ikusi al duzu?
-Ezin dizut esan, esaten badizut tranpa da, eta jolasetan ez da tranparik egin behar… baina (ahopeka) zergatik ez duzu deitzen?
-Eta hori ez al da tranpa?
-Hori telefonoa baino azkarragoa izatea da!
Deitu egin dut.
“…itzalita edo estaldurarik gabe dago…”
-Ba ez aita, bera da zu baino azkarragoa, galdu egin duzu! Jolasa eta telefonoa!
“-Aita, etorkizuna ikusteko tramankuluren bat asmatu nahi dut!
-Zertarako?
-Aita, zertarako izango da ba? Etorkizunean non izango naizen ikusteko, norekin, nola… gauza guztiak!
-Ba imajinatu! Bota irudimena! Itxi begiak eta imajinatu!
-Zuk ere bai? Nire lagun batek ere hori esaten du, imajinatzeko, baina nik ezin dut, ez dakit etorkizuna imajinatzen… begiak itxita esaten duzu? Begiak itxita dena ilun dago…”
“-…
-Memoria txarra nuela oroitzen dut!
-Ba hori oroitzea memoria ona da!
-Ez nuen ba memoria ona nuenik oroitzen!
-Lasai, ahaztu…
-Ahaztu zer?
-…”
“-Txukun idatzi, ez irten arrastotik!!
-Arrastoa, arrastoa… ze arazo duzue helduek arrastoak gurutzatzearekin?”
“Korosti mendiko pagadi batean, luxuzko onttobeltz batean nuen apartamentua! Ni bezala asko gara azken astetan etxea galdu dugun iratxoak! Nik sikiera beste traste honetan aurkitu dut babesa…”
